तिलोत्तमा । भदौ ६ गते । लिस्नु कप फुटबल प्रतियोगिताको २३ औ संस्करण यही भदौ १४ गते शनिबारबाट शुरु हुने भएको छ । रुपन्देहीको तिलोत्तमा–१५ मा रहेको लिस्नु युवा क्लबको आयोजनामा हुने प्रतियोगिता कोटिहवास्थित श्री पशुपति माध्यमिक विद्यालयको प्रांगणमा हुने आयोजकले जनाए । शुक्रबार पथ्थरडाँडामा आयोजित पत्रकार सम्मेलनमा बोल्दै खेल संयोजक पदमबहादुर थापाले भाद्र १४ गतेबाट शुरु हुने प्रतियोगिताको फाइनल खेल भाद्र २७ गते शुक्रबार हुने बताए । प्रतियोगिताको विजेता टिमले ४ लाख ४ हजार ४४४ रुपैया नगद, ट्रफी, मेडल र प्रमाणपत्र प्राप्त गर्नेछ भने उपविजेताले २ लाख २ हजार २२२ रुपैया सहित ट्रफी, मेडल र प्रमाणपत्र पाउनेछ । यसै गरि सर्वोत्कृष्ट खेलाडीलाई २५ हजार, उत्कृष्ट गोलरक्षकलाई १२ हजार ५ सय, सर्वाधिक गोलकर्ताले १२ हजार ५ सय, राइजिङ खेलाडीले १२ हजार ५ सय प्रत्येक दिनको सर्वोत्कृष्ट खेलाडीले ५ हजार र अनुशासित टिमले आकर्षक ट्रफी पाउने खेल संयोजक थापाले बताए । प्रतियोगिता ९ ए साइड को रहनेछ । यस वर्ष ८ सय जना दर्शक व्यवस्थित साथ बसेर हेर्ने व्यवस्था मिलाईको छ । खेललाई व्यवस्थित बनाउन जिल्ला फुटबल संघबाट निर्णायक टोलीलाई आमन्त्रण गरिएको छ र खेललाई फिफाको नियमानुसार खेलाइने लिस्नु क्लबका सचिव मनोज कुमार क्षेत्रीले जानकारी दिनुभयो । प्रतियोगितामा सहभागि सम्पूर्ण टिमका खेलाडीहरुको खेलअवधि भरका लागि १ लाखको दुर्घटना बिमाको व्यवस्था रहेको क्षेत्रीले जनाए । प्रतियोगितामा आयोजक लिस्नु युवा क्लबसहित रुपन्देही नवलपरासी पाल्पा र वालिङ नगरपालिका गरी १२ क्लबको सहभागिता रहेको छ । २०८२ साउन १० गते बसेको बैठकको निर्णयअनुसार, प्रतियोगिताको मुख्य प्रायोजक यशोदा फुड्स र सह–प्रायोजक तिलोत्तमा नगरपालिका वडा नं. १५ को वडा कार्यालय रहेको क्लबका अध्यक्ष तिर्थराज मल्लले बताए । क्लबका अध्यक्ष तिर्थराज मल्लको अध्यक्षता, तिलोत्तमा नगरपालिका वडा नम्बर १५ का वडा अध्यक्ष खेमराज गुरुङ्गको प्रमुख आतिथ्यतामा सम्पन्न कार्यक्रमा रुपन्देही फुटबल संघका अध्यक्ष लोक बहादुर पुन, पन्चकन्या समूहका प्रवन्धक देवेन्द्र साहू, यसोदा फूड्सका मधुसुदन घिमिरे लगायतले मन्तव्य राख्नुभएको क्लबका सचिव मनोज कुमार क्षेत्रीले बताउनुभयो ।